Arestado ang isa ka lalaki matapos nakuhaan sang armas-luthang sa Barangay Poblacion Proper,Mambusao.
Ginkilala ang suspek nga si alyas Toto,yara sa legal nga pang-edaron kag residente sang Barangay Bolo,Roxas City.
Sa interview sang Bombo RAdyo kay Police Major Ruby Magallanes, Officer in charge sang Mambusao Municipal Police station, iya ginpahayag nga may yara sang nag-report sa ila talatapan nga may isa ka persona nga nagahulag sang makaduluda.
Suno kay Magallanes,gilayon nga nagresponde ang kapulisan sa lugar kag naaktohan sang mga ini ang nasambit nga persona nga bukas ang sling bag kag may unod nga armas-luthang.
Pahayag pa niya, tuga sa kapaslawan nga makahatag sang nagakaigo nga dokumento sa paghupot kag pagdala sang armas-luthang, gin-aresto sang mga awtoridad ang suspek kag nakumpiskar ang dala sini nga isa ka unit sang .38 caliber revolver nga wala sang serial number number,kag may anum ka mga bala.
Sa subong, yara na sa kustodiya sang Mambusao Municipal Police Station ang nadakpan kag magapangatubang sang kaso nga paglapas sa Republic Act 10591 ukon Comprehensive Law on Firearms and Ammunition Regulation Act.
