Arestado man ang isa ka lalaki matapos nakuhaan sang iligal nga armas-luthang sa Sitio Casandra, Barangay Punta tabuc, Roxas City.
Ang nadakpan amo si alyas “buktot”, yara sa legal nga pang-edaron kag residente sang Barangay IX, sa sini nga siyudad.
Sa interview sang Bombo Radyo kay Police Chief Master Sargeant Ramil Arcangeles, spokesperson sang Roxas City Police Station, iya ginpahayag nga samtang naga ronda ang mga katapo sang kapulisan sa amo nga barangay nadiparahan nila nga nagapungko si alyas “buktot” sa iya motor kag pagkakita sini sa mga pulis, hinali na lang ini nga nagliso sang iya motor kag naghana nga magpalagyo.
Suno kay Arcangeles, sang malagyo na ini kuntani nadiparahan sang kapulisan nga may sukbit ini nga armas-luthang sa iya hawak rason nga gin-hold ini sang mga kapulisan
Narekober sa paghinakop sini ang .45 caliber pistol, magazine nga may tatlo ka bala, cash, box nga may unod sang ginapatihan shabu kag isa ka unit sang motorsiklo.
Magapangatubang sa kaso nga paglapas sa Republic Act 10591 ukon Comprehensive Firearms and Ammunition Regulation Act kag paglapas sa Republic Act 9165 ukon ang Comprehensive Dangerous Drugs Act of 2002 ang amo nga arestado.
