ROXAS CITY – Nagparekord sa Roxas City Police Station ang 28 anyos nga lalaki matapos ginaalegar ginsumbag kag ginkuhaan sang kwarta sa Roxas Avenue, Roxas City.
Ginkilala ang tagreklamo kay Depee Dorado, residente sang Barangay Poblacion Ilaya, Panit-an, Capiz.
Sandig sa reklamo ni Dorado, maga-deposit kuntani ini sang kwarta sa isa ka bangko sa nasambit nga lugar apang ginaalegar ginpalapitan ini ni Rodolfo Bialen kag ginsumbag.
Dugang pa sini nga ginkuha man sang ni Bialen ang iya kwarta nga nagalab-ot sa P150, 000 antes nagpalagyo.
Sa pihak nga bahin, nagpabalhag man sang reklamo sa Roxas City PNP si Bialen batuk kay Dorado.
Suno kay Bialen, nag-komprontahanay sila ni Dorado kag ginpahog siya sini nga iga-raid ang iya nga balay.
Bangud sa pagbaisay, ginsumbag ni Bialen si Dorado.
Ginpahayag pa ni Bialen nga ginkuha sini ang bag ni Dorado bangud may unod ini nga .9mm nga armas-luthang, isa ka magazine kag 31 tanan ka mga bala apang wala ini sang unod nga kwarta.
Bangud wala sang nagakaigo nga dokumento sa iya armas-luthang si Dorado, ginhunong ini sa karsel sang Roxas City PNP.
