CUARTERO, CAPIZ- Arestado ang isa ka lalaki nga ginakabig bilang Street Level Individual (SLI) sa drug buybust operation nga ginpatigayon sang mga kapulisan sa Barangay Angub, Cuartero, Capiz.
Ang arestado amo si alyas ‘Mar’, 40-anyos kag residente sang Barangay Manhoy, Dao, Capiz.
Sa interview sang Bombo Radyo kay Police Captain Alladen Talaban, Hepe sang Cuartero Municipal Police Station, iya ginpahayag nga natigayon nga nadakpan ang amo nga lalaki pamaagi sa gintingub nga pwersa sang mga katapo sang Station Drug Enforcement Team (SDET) Cuartero Municipal Police Station kag Provincial Drug Enforcement Unit (PDEU) sang Capiz Police Provincial Office.
Nakuha sa posesyon sini ang tatlo ka mga sachet sang ginapatihan shabu, P1,200 nga buybust money, isa ka lighter, isa ka kaha sang sigarilyo nga wala sang unod kag isa ka pouch nga nagaduag itom.
Samtang, ginabulubanta nga yara sa mas ukon menos 3.3 gramos ang ginapatihan nga shabu kag may market value nga P6,500.
Ang nasambit nga arestado ang sa karon nagapangatubang sa kaso nga paglapas sa Republic Act 9165 ukon ‘Comprehensive Dangerous Drugs Act of 2002’.
Sa karon, yara na ini sa kustodiya sang Cuartero Municipal Police Station para sa nagakaigo nga disposisyon.
