ROXAS CITY – Karsel sang Cuartero Municipal Police Station ang gintup-an sang 36-anyos nga lalaki matapos nga gin-aresto ini bangud sa pagbitbit sang iligal nga armas-luthang sa Barangay Agdahon, Cuartero, Capiz.
Ginkilala ang gin-aresto kay Avery Mayo Degara, nga residente sang nasambit nga lugar.
Sandig sa nakuha nga impormasyon sang Bombo Radyo sa Cuartero MPS, nga yara sa isa ka tiyangge ang suspek, sang nagpadulong ang pulis nga nadesignar sa PIU sang Capiz PPO nga residente sang nasambit nga barangay.
Ginpahayag nga ginsita sang pulis ang suspek sa iya ginabitbit nga .45 calibre nga armas-luthang, apang wala nagpati ang lalaki kag nagluntad ang pag-ilinaway.
Natigayon nga maagaw sang pulis ang armas apang naglupok ini sang maka-isa ka beses.
Masuwerte naman nga wala sang naigo sa lugar.
Magluwas sa nasambit nga armas, narekober man ang magazine, 1 ka baseyo kag 3 ka bala sang amu nga armas-luthang.
Natalana ini nga pasakaan sang panumbungon nga paglapas sa RA 10591 ukon “The Comprehensive Firearms and Ammunition Regulation Act.”
