Arestado ang 28-anyos nga lalaki matapos nakuhaan sang armas kag ginasuspetsahan nga iligal nga droga sa ginpatigayon nga entrapment operation sang Roxas City Police Station sa Barangay Jumaguicjic, Roxas City sang Oktubre 6, 2026.
Ang subject person amo si alyas “Mac-Mac,” residente sang amo man nga barangay.
Sa interview sang Bombo Radyo kay Police Lieutenant Colonel Rogelio Tomagtang Jr., iya ginpahayag ang pagkadakop sang nasambit nga lalaki sa ginpatigayon nga operasyon sang mga kapulisan.
Suno kay Tomagtang, narekober sa posesyon sang subject person ang isa ka homemade break-type caliber .22 pistol, duha ka sachet sang ginasuspetsahan nga shabu kag P2,000 nga buy-bust money.
Sa subong, yara na sa kustodiya sang Roxas Component City Police Station ang subject person nga nagapangatubang sang kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9165 ukon Comprehensive Dangerous Drugs Act of 2002.
