Arestado ang isa ka lalaki sa ginkasa nga drug buy-bust operation sa Barangay Punta Tabuc, Roxas City.
Ang subject person amo si alyas JB, 22-anyos kag residente sang Brgy. Lanot, Roxas City.
(ROXAS PNP)
Sandig sa impormasyon nga nakuha sang Bombo Radyo sa Roxas Component City Police Station, narekober gikan sa subject person ang isa ka caliber 45 pistol, isa ka magazine kag duha ka bala, anum ka sachet sang ginapatihan shabu nga may kabug-aton nga 14 gramos kag ginabanta may balor nga P95,200.00.
Nakuha man sa paghinakop sang subject person ang P10,000 nga buy-bust money.
Sa subong, yara na sa kustodiya sang Roxas Component City Police Station kag magapangatubang sang kaso nga Republic Act No. 10591 ukon Comprehensive Firearms and Ammunition Regulation Act kag Republic Act No. 9165 ukon Comprehensive Dangerous Drugs Act of 2002.
