DAAN BANWA, Tapaz, Capiz – Arestado ang isa ka lalaki sa hot pursuit operation matapos ang pagpangbuno kun sa diin nga ginapahayag nag-ugat sa daan nga indi pag-intindihanay sang duha ka mag abyan sa Barangay Daan Banwa, Tapaz, Capiz.
Ang suspek amo si alyas Botoy, 56-anyos, samtang ang biktima ginkilala sakay alyas Lito, sitentay singko 65-anyos, nga lunsay residente sang nasambit nga lugar.
Sa interview sang Bombo Radyo kay Police Major Gregg Anthony V Salbang, Chief of Police sang Tapaz Municipal Police Station, iya ginpahayag nga suno sa ila imbestigasyon, magkaupod nga nagainom ang biktima kag suspek sang gab-i sang insidente, sang nabuksan liwat ang daan nila nga alitan.
Suno kay Salbang, naghalin na ang suspek sa amo nga lugar apang nagbalik ini, nga may dala na ini nga kutsilyo nga gin-gamit sa pagpangbuno sa biktima nga sadto yara sa isa ka balay kag nagapakig-estorya sa tag-iya sini, kun sa diin matapos ang insidente nagpalagyo ang suspek, gani gilayon nga nagpatigayon ang kapulisan sang hot pursuit operation kag madinalag-on ini nga na aresto matapos nakabaton sang impormasyon halin sa isa ka opisyal sang barangay
Pahayag pa niya, duha ka pilas ang naagom sa lawas ni alyas Lito, isa sa idalom nga bahin sang dughan kag isa sa likod, bangud sa naangkon nga pilas gilayon gindala sa pampubliko nga ospital ini para sa nagakaigo nga pagbulong kag suno sa impormasyon halin sa pamilya, stable na ang iya kondisyon sa karon.
Lakip man sa mga ebidensya nga ginatutukan ang kutsilyo nga gin-gamit sa insidente kag ang mga testigo nga mahimo makabulig sa kaso kun sa diin ini narekober sa amo nga adlaw natabo ang pagpangbuno sa scene of the crime.
Dugang pa sa impormasyon ikaduha na nga narekord sang Tapaz PNP ang stabbing incident sa bulan sang November, gani ginapadayon sang kapulisan ang information dissemination sa mga barangay kag pakig-angot sa mga opisyal sini agud malikawan ang kaangay sa sini nga mga insidente.
Sa karon, ginapahanumdom sang Tapaz PNP ang publiko nga sulbaron paagi sa maayo nga pag-istoryahanay, kag legal nga pamaagi ang bisan ano nga indi pag-intindihanay, samtang ang suspek yara na ini sa kustodiya sang kapulisan nagahulat sang desisyon sang biktima kon magpasaka ini sang reklamo.
