Arestado, ang isa ka lalaki sa pagbaligya sang armas-luthang sa Barangay Daga, Panay, Capiz.
Ginkilala ang nadakpan kay Alyas “Jose”, 25-anyos kag residente sang nasambit nga lugar.
Sa impormasyon nga nakuha sang Bombo Radyo nagikan sa Panay PNP, nadakpan sa akto ang suspek nga nagabaligya sang indi lisensyado nga armas-luthang kag natigayon ini nga madakpan pinaagi sa pulis nga nagpakuno-kuno poseur buyer.
Nakuha sa iya paghinakop ang (1) unit caliber .38 revolver kag lima ka mga bala, kapin P3,000 nga balor sang kwarta sa nagkalain-lain nga denominasyon.
Wala naman sang may ginpakita sang nagakaigo nga dokumento ang suspetsado angut sa narekober nga armas-luthang sa iya paghinakop.
Magapangatubang sa kaso nga paglapas sa Republic Act 10591 ukon Comprehensive Firearms and Ammunition Regulation Act ang nasambit nga suspetsado.
Sa karun, yara na ini sa kustodiya sang Panay PNP, para sa nagakaigo nga disposisyon.
