Arestado ang isa ka lalaki matapos makuhaan sang indi lisensyado nga armas luthang kag suspected shabu sa Sitio Bungyod, Barangay Binuntucan, Pontevedra, Capiz.
Ang arestado amo si alyas nga “Bart,” residente sang Barangay Agbanog sang amo nga banwa.
Sa interview sang Bombo Radyo kay Police Captain Maria Fe Umiten, Officer-in-Charge sang Pontevedra Municipal Police Station, iya ginpahayag nga nakabaton ang kapulisan sang report halin sa isa ka concerned citizen may kaangtanan sa isa ka persona nga nagalakat sa dalan samtang may bitbit nga armas luthang.
Suno kay Umiten, gilayon nga nagresponde ang mga kapulisan sa lugar kag naaktuhan ang suspek nga may dala nga isa ka .38 caliber revolver nga wala sang serial number kag loaded sang lima ka bala.
Dugang pa sang natungdang, nakuha man sa paghinakop sang arestado ang tatlo ka sachet sang suspected shabu nga ginabanta may kabug-aton nga lima ka gramo kag may standard drug price nga P34,000.
Sa subong, nagapabilin sa kustodiya sang Pontevedra Municipal Police Station ang suspek kag magapangatubang sa kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9165 ukon Comprehensive Dangerous Drugs Act of 2002.
