BINUNTUCAN, Pontevedra, Capiz – Arestado ang isa ka lalaki sa ginpatigayon nga buy-bust operation sa Sitio Uyapad Barangay Binuntucan, Pontevedra, Capiz.
Ang suspek amo si alyas Win, 25-anyos, laborer, kag residente sang Poblacion Swa, Pontevedra, Capiz.
Sa interview sang Bombo Radyo kay Police Captain Maria Fe T. Umiten, Officer-in-Charge sang Pontevedra Municipal Police Station, iya ginpahayag nga ang operasyon nagumpisa pasado alas-1:00 sang hapon kahapon nga adlaw.
Suno kay Umiten, nabakal sang police poseur buyer ang nasambit nga armas sa balor nga P3,000, nga ginkabig nga paglapas sa Republic Act 10591 ukon Comprehensive Firearms and Ammunition Regulation Act.
Samtang sa pagpatigayon naman sang search incidental to lawful arrest, narekober man sa posisyon sang suspek ang duha ka heat-sealed plastic sachet nga ginapatihan nga shabu, may kabug-aton nga 3grams kag ginabulubanta nga nagabalor sang P20,400.
Lakip pa sa mga nakumpiskar ang black sling bag, marked money nga P100, counterfeited buy-bust money nga nagabalor sang P2,900, kag isa ka commando match.
Sa karon, ang suspek yara na sa kustodiya sang Pontevedra Municipal Police Station samtang ginapreparar ang nagakaigo nga kaso batok sa iya may kaangtanan sa paglapas sa Republic Act 10591 kag Republic Act 9165 ukon Comprehensive Dangerous Drugs Act of 2002.
