MALOCLOC NORTE, Ivisan Capiz – Arestado ang isa ka lalaki sa pagpalupok sang armas luthang kag iligal nga droga sa Barangay Malocloc Norte, Ivisan, Capiz.
Ginkilala ang suspetsado sakay alias George, 47-anyos, kag residente sang nasambit nga lugar.
Sa interview sang Bombo Radyo kay Police Major Rile F. Villariez Jr., Officer-in-Charge sang Ivisan Municipal Police Station, iya ginpahayag nga nakita sa akto ang suspek nga may dala nga armas luthang nga isa ka homemade 12 gauge shotgun, nga iligal man niya nga gina panagiyahan.
Suno kay PMaj. Villariez Jr., bangud sa pagdala sang armas luthang sang suspek ang kakugmat sa iya palibot amo man ang nangin rason sa pag report sang isa ka concerned citizen sa iya sa katapo sang kapulisan samtang dugang man sa nakuha sa posisyon sang suspek ang isa ka transparent heat sealed sachet nga nag positibo bilang isa ka iligal nga droga.
Pahayag pa niya nangin subject person naman si alias George sa isa ka search warrant, apang wala ini natigayon nga ma aresto.
Dugang pa sang natungdan kaso nga paglapas sa Republic Act 10591 ukon mas kilala sa ginatawag nga Comprehensive Firearms and Ammunition Regulation Act kag Republic Act 9165 nga Comprehensive Dangerous Drugs Act of 2002 sa karon ang ipasaka nga kaso batok sa suspetsado.
Ginapahanumdom man sang Ivisan Municipal Police Station nga ano man nga sahi sang paglapas sa layi ukon kahinahinala nga aktibidad mahimo nga gilayon nga ireport agud ini mahatagan sang nagakaigo nga aksyon kag matapna antes pa ini magresulta sa mas malala nga insidente.
