Arestado ang isa ka lalaki, matapos nga nakuhaan sang armas-luthang sa Barangay Quinayuya, Dao, Capiz.
Ang lalaki amo si alyas ‘Edgar’, 25-anyos, laborer kag residente sang nasambit nga lugar.
Sa impormasyon nga nakuha sang Bombo Radyo nagikan sa Dao Municipal Police Station, ginpahayag nga ang lalaki nagalakat sa karsadahon sang nasambit nga lugar nga may bitbit nga armas.
Nakuha sa paghinakop sini ang isa ka unit sang improvised 12-gauge shotgun nga loaded sang isa ka live ammunition.
Nahibaluan nga ang amo nga lalaki ang yara sa impluwensya sang makahulubog nga ilimnon.
Nagapagatubang ini sa kaso nga paglapas sa Republic Act 10591 ukon “Comprehensive Firearms and Ammunition Regulation Act.”
Sa subong, nagapabilin ang amo nga lalaki sa kustodiya sang Dao Municipal Police Station para sa nagakaigo nga disposisyon.
