Dakop ang isa ka lalaki matapos makuhaan sang armas-luthang kag ginapatihan iligal ng droga sa Barangay Poblacion, President Roxas, Capiz.
Ang arestado amo si alyas tantan, 25-anyos, kag residente man sang nasambit nga lugar.
Sa interview sang Bombo Radyo kay Police Captain Joebert De Los Reyes, Officer-in-Charge sang President Roxas Municipal Police Station, iya ginpahayag nga nakit-an ang nasambit nga indibidwal nga nagataklos sang armas-luthang rason nga gilayon man nga ginrespondehan sang mga kapulisan.
Suno kay De Los Reyes, nagtinguha pa nga magpanago ang amo nga lalaki apang madasig ini nga nadakpan sang mga otoridad.
Nakuha sa paghinakop sang nasambit nga lalaki ang isa ka caliber .38 revolver, duha ka mga bala , kag tatlo ka sachet sang ginapatihan shabu nga may kabug-aton nga ginabulubanta 5 gramos kag may standard drug price nga P27,200.
Sa subong, yara na sa kustodiya sang President Roxas Municipal Police Station ang arestado kag magapangatubang sang kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9165 ukon Comprehensive Dangerous Drugs Act of 2002.
