Lalaki dakop nga ilegal nga nagabaligya sang tiningi nga gasolina sa Barangay Libas

ROXAS CITY – Dakop ang isa ka persona nga ilegal nga nagabaligya sang tiningi nga gasolina sa Purok 1, Barangay Libas, Roxas City.

Ginkilala ang nadakpan kay Joseph Romano, 49 anyos, residente sang nasambit man nga lugar.

Narekober kay Romano ang walo ka 20-liter galloon, isa ka 30-liter gallon kag 12 ka 40-liter gallon kag mga botelya nga lunsay may unod nga gasolina kag mga kagamitan nga ginagamit sini sa ilegal nga aktibidad.

Mahibaluan nga nakabaton sang impormasyon ang mga otoridad natuhoy sa ilegal nga aktibidad ni Romano sa amo nga lugar rason nga ila ini nga ginpadulungan.

Sa karon yara na sa kustodiya sang mga otoridad ang mga nakompiskar kay Romano.