Roxas City – Padayon ang search and retrieval operation sang Maayon Emergency Response Team (MERT) kag Philippine Coast Guard-Capiz Chapter matapos nga ginaalegar gin-anod sang tubig baha ang isa ka lalaki nga sakay sa tricycle kag magatabuk na kuntani sa suba sang Barangay Old Guia kag Barangay New Guia, Maayon, Capiz.
Ginkilala ang biktima nga si Cornillo Dapulasa 50-anyos kag residente sang Barangay New Guia sa nasambit nga banwa.
Sa interview sang Bombo Radyo Roxas kay Brgy. Kagawad Rannier Cantiller nga nagpangayo pa sang bulig ang biktima sa tanod matapos nga hinali na lamang nga nagpundo sa tunga sang tulay ang ginamaneho nga tricycle.
Bangud diri, nagpanaog pa ang biktima agud magpangayo sang bulig sa tanod para nga pabalikon na lamang kuntani sa babaw ang tricycle. Gilayon naman nga nagkuha sang pisi ang tanod apang ginkatingala na lamang sini nga pagbalik niya l wala na ang tricycle kag nasambit nga biktima.
Ginapahayag nga posible gin-anod sang mabaskog nga tubig baha ang nasambit nga biktima kag iya nga tricycle.
Nahibaluan nga naglapaw sa tulay ang tubig baha kagab-i apang gintuyo sini sa gihapon nga magtabuk.
Suno naman sa pila ka mga residente sa Barangay Jebaca nga nakita pa nila ang biktima samtang ginaanod sang tubig kun sa diin nakasakay ini sa dalutdot kag nagapangayo sang tabang.
Apang, indi nila ini mabuligan bangud sa padayon man ini nga ginadala sang tubig.
Samtang, ginpahayag naman ni Petty officer, Third Class PO3 Joe Marie Amenazar sang PCG-Pilar Sub Station nga wala nag-untat ang mga coast guard sa pagpangita sa biktima.
Sa karon nagalaom naman ang pamilya sini nga luwas kag buhi ang ila nga himata.
