ROXAS CITY – Arestado ang isa ka lalaki nga yara sa provincial level Anti-Illegal Drugs Watchlist matapos, ang ginkasa nga drug buy bust operation sa Barangay Punta Tabuc, Roxas City, Capiz ala 1:02 sang hapon kahapon Hulyo 12.
Ginkilala ang nadakpan kay Dionesio Andres Jr. 36-anyos, tricycle driver kag residente sang Barangay 9, Roxas City.
Sa impormasyon nga nagikan sa Roxas City PNP, natigayon nga madakpan si Andres pinaagi sa gintingub nga pwersa sang Capiz-PPDEU, Capiz-PPO kag Philippine Drug Enforecement Agency (PDEA) Regional 6 matapos mabaklan sang ginapatihan shabu sang isa ka pulis nga nagpakuno-kuno poseur buyer nga nagabalor P6,000.
Nakuha sa paghinakop ni Andres ang 8 ka sachet sang ginapatihan shabu nga may kabug-aton ginabulubanta 25 gramos kag Standard Drug Price nga P170,000, P1,000, sigarilyo, coin purse nagaduag itom, kag isa ka unit sang keypad cellphone nagaduag asul.
Kaso nga paglapas sa RA 9165 ukon Comprehensive Dangerous Drugs Act of 2002 ang paga-atubangon sang nadakpan.
Sa karun yara na sa paghinakop sang Roxas City PNP ang amu nga persona, para sa nagakaigo nga disposisyon.
