ROXAS CITY – Menor nga pilas sa ulo ang naangkon sang 30-anyos nga lalaki matapos nga ginbuno ini sa Barangay Punta Tabuc, sini nga syudad, alas-10:20 kagab-i sang Martes.
Ginkilala ang biktima kay Erwin Extinado, residente sang Brgy Pawa, Panay, Capiz apang temporaryo nga nagapuyo sa syudad.
Sandig sa impormasyon nga nakuha sang Bombo Radyo sa Roxas City PNP, nga suno sa ginpabahag sang biktima, nagalakat ini kag ang iya katrabaho nga si Christian Ego nagikan sa ila compound padulong sa tiyangge agud magbakal sang sigarilyo.
Apang pag-abot sa unhan sang isa ka Chinese school, nalabayan nila ang babayi kag lalaki nga nagabaisay.
Ginsinggitan sang suspek nga si certain ‘Biboy Dellava’ ang duha kun ano ang ila gina-dila-dila sa iya asawa, kag nagsabat si Erwin nga wala nila ginadilaan ang babayi kag mabakal lang sang sigarilyo.
Nagpadayon sa paglakat ang duha, apang sa ila pagbalik, nagabantay na sa dalan ang suspek kag madasig nga ginbuno ang biktima.
Gilayon nga nagpalagyo ang suspek kag wala na makita sang mga kapulisan sang ginpadulongan ang lugar.
