ROXAS CITY – Dead on arrival nga ginpadangat sa Mambusao District Hospital ang 41-anyos nga lalaki, matapos nga ginpahayag ginbuno sa Sitio Mantiti, Najus-An, Mambusao Capiz, kagab-i sang Domingo, Setyembre 25.
Ginkilala ang biktima kay Ricky Launio Jamison, residente sang Brgy. Balat-an, banwa sang Mambusao.
Samtang, ang suspek amu si Rolly Oliverio Estocada, 46-anyos, aktibo nga miyembro sang CAFGU kag residente of Brgy Bula. sa kaangay nga banwa.
Sandig sa inisyal nga imbestigasyon ni PSSg. Ryan M. Villas, imbestigador sang Mambusao MPS, nga alas-7:45 sa gab-i sang nagapauli ang biktima kag ang suspek kaupod ang isa pa ka nila ka upod nga si Ally Lipardo Patriarca, 46-anyos, nagikan sa balay ni Gerold Oso Patriarca matapos nag-inom sang makahulubog nga ilimnon, sang nagpatunga ang indi pag-intindihanay sa biktima kag suspek.
Tubtob nga ginbuno ni Estocada si Jamison sang madamo nga beses sa magkatuhay nga parte sang lawas.
Ginrespondehan sang Mambusao Emergency Response Unit ang biktima, apang ginbawian ini sang kabuhi.
Natigayon man nga maaresto ang suspek sa iya nga puloy-an, kaina sang kaaganhon matapos ang ginpatigayon nga hot pursuit operation sang kapulisan.
Sa karon, nagapabilin ini sa kustodiya sang Mambusao MPS para sa nagakaigo nga disposisyon samtang nagapadayon ang imbestigasyon sa madalom nga motibo sa krimen.
