Pilason ang isa ka lalaki matapos ginbuno sang iya upod sa ilimnan sa Sitio Tugbungan, Barangay Tanza, Roxas City,.
Ang biktima ginkilala nga si alyas Elmer, 47-anyos samtang ang suspek amo si alyas Noril, 35-anyos, residente man sang amo nga barangay.
Base sa inisyal nga imbestigasyon sang Roxas City Police Station, nagainom ang biktima upod sa iya abyan sang nag-abot ang suspek kag nagtinguha nga mag-upod sa inuman.
Apang ginpahalin ini sang biktima bangud suno sa iya, pirmi lamang nagagamo ang suspek kon makahubog.
Bangud sini, naakig ang suspek kag gulpi nga nagguwa sang kutsilyo nga nakasukbit sa iya hawak antes ginbuno ang biktima sa wala nga bahin sang tiyan.
Nasaksihan ang insidente sang barangay kagawad nga si Erwin Alianza, utod sang biktima, nga nagdali nga nagdakop sa suspek, samtang ang mga barangay tanod ang nagdala sa biktima sa ospital agud matambalan.
Sa subong, nagapreparar na ang Roxas City Police sang mga kinahanglanon nga dokumento agud mapasakaan sang nagakaigo nga kaso ang suspek.
