Ka-bombo, nakaagi na bala kamu nga ginbasted sang inyo nga ginpangaluyagan?
Kon kaisa, napaminsar ta nga masakit man nga bastedon kita ilabi pa nga kon ginhimo mo man ang tanan, apang indi gid worth it!
Bangud didto sa may India, makahalam-ot ang natabo matapos nga ginhabuyan sang gasoline bomb sang isa ka lalake ang balay sang babaye nga nagbasted sa iya.
Ang suspek amo si Karthik alyas Mariyappan, nga tuman gid nga nasakitan matapos siya nga ginbasted siya sang babaye nga si Priya, isa ka college student.
Suno sa report, nagkilalahanay ang duha kag nangin mag-abyan antes pa man naglab-ot sa pagpangaluyag ang lalaki.
Apang sang ulihi, gin-utod ni Priya ang ila komunikasyon pagkatapos niya natukiban nga si Karthik nadalahig sa mga kaso sang pagpangawat kag pagpatay.
Bangud sa kaakig kag indi pag-ugyon sa ginhimo nga pagbasted ni Priya, ginpahayag nga nagpadulong ang lalaki sa balay sang babaye kag ginhabuyan sang gasoline bomb nga nag-igo sa ugsaran kag nakapark nga salakyan rason nga nagluntad ang sunog.
Padayon naman ang imbestigasyon sang mga otoridad sa nasambit nga insidente kag pagpangita sa amo nga lalaki.
