ROXAS CITY – Wasak ang nawong kag utod ang lima ka mga tudlo sa natuo nga kamot sang 32-anyos nga lalaki sang masapwan sang tiyo sa balay sini sa Barangay Bating, Mambusao, Capiz.
Ginkilala ang biktima nga si Jonel Candido nga indi na halos makilala bangud gintadtad sang labo ang iya nga nawong sang wala pa nakilala nga suspek.
Nahibaluan lamang sang tiyo nga si Jogarie Candido ang malain nga natabo sa hinablos sang nag-agi ini sa balay sang biktima matapos nakita nga nagabulambod ang pagkahigot sang pisi sa kalabaw.
Matapos mahigot ang pisi gintawag sang tiyo ang biktima apang wala ini nagasabat rason nga nagsulod na ini sa balay.
Amo na lamang ang pagkakibot sang tiyo sang makita sini nga nagapaligo sa kaugalingon nga dugo ang hinablos.
Sa imbestigasyon sang Mambusao Municipal Police Station nagaguwa nga antes ang krimen nakita pa nga nagainom ang biktima kaupod ang mga kaingud balay.
Suno sa mga kaingud balay sang biktima sang gab-i nakabati sila sang lupok sang pusil, apang bangud mabaskog ang ulan wala na nila makadtuan ang balay sang biktima.
Narekober sang mga pulis sa ginluntaran sang krimen ang duha ka empty shell sang .22 nga pistola kag bala sang 12 gauge shotgun.
