Patay ang isa ka lalaki matapos ginluthang sang apat ka armado nga mga suspek sa atubang sang iya menor de edad nga anak nga lalaki sa Sitio Bebang, Barangay General Luna, Toboso, Negros Occidental.
Ang biktima amo si alyas Jobert, 37 anyos, isa ka negosyante kag residente sang nasambit nga lugar.
Suno sa report, papauli na kuntani ang biktima matapos mag-book sang karne sang baboy sa merkado sang gin-ambush sang mga suspetsado sa guwa sang iya balay kag ginluthang sang makapila ka beses sa ulo.
Nasaksihan sang iya anak ang insidente, samtang pagkatapos sang pagpangluthang, ginsulod sang mga suspek ang balay kag ginkawat ang pila ka mga cellphone antes nagpalagyo.
Padayon ang imbestigasyon sang kapulisan agud matumod ang mga suspetsado kag posible motibo sa krimen.
