ROXAS CITY – Yara na sa kostodiya sang Cuartero Municipal Police Station ang 22-anyos nga suspek nga ginatudlo responsable sa pagluthang-patay sa kaupod sa ilimnan kag trabaho sa isa ka piggery sa Barangay Agdahon, banwa sang Cuartero.
Nahibaluan nga ginluthang-patay ang biktima nga si Eduardo Candido 45-anyos sang Barangay Osorio, San Remigio Antique sang suspek nga si Johnny Lilia sang Barangay Madong, Janiuay, Iloilo gamit ang homemade 12 gauge shotgun.
Ba-se sa inisyal nga imbestigasyon sang Cuartero PNP nga magkaupod pa nga nag-inum ang duha nga magkaupod sa trabaho sa isa ka piggery, apang yara na sa kainitan sang ila pag-inum, hinali nakamuno ang suspek nga si Lilia sang madugay na nga kalain sang buot sa biktima nga si Candido.
Apang nagpanugyan si Candido nga ipaiway ang ila lainay sang buot kag mag-enjoy sa ila pag-inum.
Apang hinali lamang nga ginkuha sang suspek ang armas kasunod ang pagtiro sa biktima sa baba kag tiyan.
Gindala pa sa Senator Gerardo Roxas District Hospital ang biktima, apang gindeklara nga dead on arrival.
