Ano bala ang sarang mo nga himuon agud makapalagyo sa penalidad nga ginapangatubang sa mga otoridad?
Sarang mo man bala ayhan maghimo pagid sang indi maayo? para lang matakpan ang imo nga sala?
Didto sa Hunan, China, gin-aresto ang isa ka lalaki nga ginkilala kay alyas “Si”, matapos niya ginpeke ang iya kaugalingon nga kamatayon kag nagpatigayon pa sang lubong agud makalikaw sa mga kaso may kaangtanan sa pag-drive nga yara sa impluwensya sang makahulubog nga ilimnon kag wala sang valid nga lisensya.
Suno sa mga kapulisan, ikatatlo na nga beses nga naaresto ang lalaki sa pareho nga paglapas.
Samtang temporaryo nga hilway si Si bangud nakapiyansa, nagplano ini nga i-peke ang kaugalingon nga kamatayon agud indi na siya pagpangitaon sang mga otoridad.
Ginsugo niya man ang iya pamilya nga magbakal sang lungon kag papatihon ang mga tawo nga napatay siya bangud sa overdose.
Apang nagduda ang mga otoridad bangud sang mga iregularidad sa insidente, lakip ang pagbakal sang lungon antes pa sang gin-alegar nga kamatayon, wala sang ambulansya nga gintawag, kag wala man sang death certificate ukon cremation record.
Paagi sa surveillance footage kag bank records, nakumpirma sang mga kapulisan nga buhi pa ang lalaki.
Gilayon ini nga gin-aresto kag nagapangatubang sang dugang nga mga kaso kag multa nga kapin 20,000-yuan ukon mga ₱185,000.
