ROXAS CITY, CAPIZ- Nagapadayon ang hot pursuit operation sang mga katapo sang Roxas Component City Police Station sa tatlo ka mga suspetsado sa ginapahayg iligal nga pagdakop kag pagluthang sa isa ka lalaki sa Barangay Punta Tabuc, Roxas City, Capiz.
Ang biktima amo si alyas ‘John’, 22-anyos kag residente sang Barangay Banica, Roxas City. Samtang ang ginatudlo naman nga mga suspek amo sanday alyas ‘Toti’, alyas ‘Pidoy’, kag alyas ‘Alog’ nga lunsay yara sa legal nga pang-edaron kag lunsay mga residente sang syudad sang Roxas.
Sa interview sang Bombo Radyo kay Police Lieutenant Colonel Ricardo Jomuad Jr., hepe sang Roxas Component City Police Station, iya ginpahayag nga natabo ang pwersahan nga pagdakop sang iligal sa biktima sang Enero 15 pa takna las 10:00 sang aga sa Bayot Drive, Barangay IX, Roxas City.
Suno kay Jomuad, sandig sa panaysayon sang biktima, gindala ini siya sa isa ka compound sa Railway sa amo man nga barangay. Diri kag ginpahayag nga ginpulihan siya kastigo kag ginluthang sang makaduha ka beses sang ginatudlo nga mga suspek.
Natigayon nga nakapalagyo ang biktima sang Enero 18, takna las 5:00 sang hapon kag nagpadulong ini sa puluy-an sang iya nga abyan agud nga magpangayo sang bulig.
Pahayag niya, gilayon nga ginpadangat sa Roxas Memorial Provincial Hospital ang biktima para sa nagakaigo nga pagbulong.
Nagapasalig naman ang natungdan nga indi sila mag-untat tubtob sa madakpan ang amo nga mga suspetsado kag mahatagan sang nagakaigo nga disposiyon ang nasambit nga insidente.
Interviewed by Bombo Saira Joy Alu-ad Bautista
