Ginsentensyahan sang suspended sentence ang 26 anyos nga lalaki matapos mapamatud-an nga tuyo sini nga ginsunog ang iya balay sang makaduha ka beses sa sulod sang isa ka gab-i.
Suno sa korte, ginhimo ini sang lalaki indi bangud pyromaniac ini kundi bangud sa obsession sini sa mga bombero.
Ang suspek amo si James Brown sang Ashington, Northumberland.
Suno sa imbestigasyon, nagtawag si Brown sa BFP agud i-report ang ginaalegar spark sa iya electricity meter nga gintunaan sang pagsigabong sang mga habol sa sulod sang aparador.
Gilayon naman nga nagresponder ang mga bombero kag napalong ang gamay nga kalayo. Gin-utod man nila ang supply sang kuryente bilang paghalong.
Apang pagligad lamang sang 90 minutos, nagtawag liwat si Brown sa pagreport sang isa pa ka sunog. Sini nga tion, nagdabdab liwat ang mga habol, isa ka butang nga nagduda ang mga bombero bangod wala na ini sang kuryente ang iya balay.
Sa dugang nga imbestigasyon, nagguwa nga hungod nga ginsunog ni Brown ang iya puluy-an.
Ginpamatbatan sang walo ka bulan nga pagkakulong si brown nga may duha ka tuig nga suspension, kag 150 ka oras nga pag-alagad sa komunidad.
Pahayag sang abogado ni Brown,tuman ang paghinulsol sang iya kliyente kag ginpaidalom si Brown sa therapy agud mabulong ang iya obsession.
Humalin sang nadakpan siya, ginpahayag nga wala na siya nagapakig-angot sa mga bombero.
