Naghimo sang makasaysayan nga performance ang artist nga si Stelarc sa patag sang “bioart” pagkatapos nga nangin una siya nga tawo nga madinalag-on nga nagpatubo sang ikatlo nga dulunggan sa iya kaugalingon nga butkon.
Suno sa iya, naglab-ot sang kapin sa isa ka dekada kag tatlo ka plastic surgeons agud matuman ang proyekto nga “Ear On Arm”.
Ginsulod sang mga doktor ang saline solution kag silicon implant sa iya butkon, pagkatapos gintigob ang panit sa korte sang dulunggan sang tawo.
May yara man ini sang gamay nga microphone sa sulod para makakuha sang tunog.
Apisar nga temporaryo nga ginkakas ang microphone bangud sa infection, plano ni Stelarc nga ibalik ini kag i-connect sa internet.
Kon matabo ini, magaserbe ini nga remote listening device, kon sa diin ang bisan sin-o gikan sa iban nga pungsod makapamati sang live sa kon ano ang nabatian sang iya dulunggan sa iya butkon.
Plano man sini nga himuon nga Bluetooth system ang headset kun sa diin ang receiver kag speaker ang ibutang sa sulod sang iya baba.
Suno kay Stelarc, kun may magtawag sa iya cell phone, maga-istorya ini gamit ang earpiece sa iya butkon kag mabatian niya ang tingog nga “sa sulod” sang iya ulo.
