ROXAS CITY – Nag-angkon sang pilas sa ulo kag mga pasa sa lawas ang 51-anyos nga lalaki matapos sakiton sang ginaalegar karelasyon nga GRO.
Sa interview sang Bombo Radyo Roxas kay alyas Boy, isa ka foreman, ginpahayag sini nga ang iya kahidlaw sa asawa nga nagatrabaho sa iban nga pungsod ang rason sang iya nga pagpadulong sa mga bar, sa diin niya nakilala si alyas Joy nga naghatag sa iya sang pinasahi nga kalipay.
Aminado ini nga naging malipayon ang apat ka bulan nila nga pag-upod, apang wala sini nagustuhan ang padayon nga pag-upod ni Joy sa mga kostumer.
Ginkumpronta sini ang babaye apang sa wala mahibaluan nga rason, naakig ini kag ginsakit siya pinaagi sa paglampus sang bato sa iya nga ulo.
Sa pihak sini, iya ginbaton tanan nga pagsakit ni alyas Joy bangud sa iya nga pagpaalangga diri.
Samtang nagpanindugan si alyas Joy nga wala sang espesyal nga nagapatunga sa ila ni i alyas Boy, gani wala ini sang kinamatarung nga magselos ukon dumilian siya sa pag-upod sa mga lalaki nga kostumer.
Kun may ara man suno kay Joy, ini ang relasyon sang GRO kag kostumer bangud kuwarta ang iya ginapangita sa sahi sang iya trabaho.
