Arestado ang isa ka lalaki matapos nagpakuno-kuno nga biktima sang kidnap kag robbery bangud sa kakulba nga matukiban sang iya asawa nga ginpyerde sini ang masobra P65,000 sa online gambling nga ‘scatter.’
Sang damlag lang, nagkadto sa otoridad ang lalaki sa Barangay 105 sa Tondo agud nga mag-report nga ginaalegar gin-abduct ini kag gin-holdap sang wala makilal-an nga mga suspek sa isa ka mall sa Ermita.
Suno sa iya, ginbilin siya sang mga suspek sa Mel Lopez Boulevard sa Tondo.
Bangud sini, gin-assist siya sang mga personnel sang police community precinct sa Barangay 105 kag gindala sa Ermita Police Station.
Suno kay Police Major Philipp Ines, Public Information Office Chief sang Manila Police District, nagbulig gilayon ang mga kapulisan sa iya kag nagpatigayon sang follow-up investigation kag backtracking sang CCTV footage.
Apang natukiban sang kapulisan nga wala sang abduction kag robbery nga natabo, base sa pag-review sang CCTV footages sa lugar.
Bangud sini, gin-ako mismo sang lalaki nga napyerde ini sang masobra P65,000 sa online gambling nga dapat kuntani gamiton sini pangbayad sa iya visa application.
Sa video sang Manila Police District, ginpahayag sang lalaki nga nagbutig ini siya sa pulis agud indi kuntani mahibaloan sang iya asawa nga napyerde ini sa sugal.
