Lalaki nagreklamo sa Roxas City PNP matapos ginsumbag sa mata sang isa ka enhinyero

ROXAS CITY – Nagreklamo sa Roxas City Police Station ang isa ka lalaki matapos ginsumbag sang isa ka enhinyero.

Ginkilala ang tagreklamo kay Salvador Deita, residente sang Barangay Jumaguicjic, Roxas City.

Sandig sa reklamo ni Deita, nagpapinta sa iya sang salakyan si Engr. Rodel Cabantugan sang Barangay Adlawan kag nagkasugot nga magabayad ini sang P8, 000 magluwas pa sa pagpa-buffing sini.

Apang suno kay Deita, naakig si Cabantugan sang iya na ini nga gin-sukot sang separado nga bayad sa pagpa-buffing.

Dugang pa nga alegasyon ni Deita nga ginsumbag siya sang makaduha ka beses ni Cabantugan sa mata.

Bangud diri, ginpakamaayo na lamang ni Deita nga ipabalhag sa pulista ang natabo.