Isa ka 36-anyos nga lalaki sa Taiwan ang nagpadulong sa dentista bangud sa pagsakit sang iya ngipon, apang nakibot ang doktor nga may gamay nga green sprout nga nagatubo sa iya ngipon.
Suno sa tawo, nagkaon siya sang bayabas, kag ang isa ka liso nagsulod sa isa ka daku nga buho sa iya ngipon kag indi niya ini makuha bisan pa nga naga-toothbrush na ini.
Bangod sa tuman ka daku nga buho sang iya ngipon, na-trap ang liso kag tungod sa madulom, basa kag masustansya nga palibot sa sulod sang ngipon, ini ang nag-ugat kag nagtubo na.
Kinahanglan nga kuhaon sang dentista ang ngipon upod ang sprout kag nangin madinalag-on ang pagkuha sini.
Suno sa mga eksperto, talagsa lang ang amo sini apang mahimo matabo kon may yara sang madalom nga mga buho ukon mga kal-ang sa mga ngipon kon sa diin ang magagmay nga mga liso mahimo nga ma-trap.
