ROXAS CITY – Arestado ang isa ka lalaki matapos nakuhaan sang indi lisensyado nga armas-luthang sa ginkasa nga buybust operation sa Fortune St. Brgy. Banica, Roxas City.
Ginkilala ang nadakpan kay alyas Michael, 28-anyos nga residente sang Brgy. Dumulog sini nga syudad.
Sa impormasyon nga nakuha sang Bombo Radyo nagikan sa Roxas City Police Station, dakop sa akto nga nagabaligya sang indi lisensyado nga armas si alyas Michael kag natigayon nga madakpan pinaagi sa pulis nga nagpakuno-kuno poseur buyer.
Nakuha sa paghinakop sini ang ka isa ka unit sang caliber .45 pistol kag tatlo ka mga bala, kapin P7,000 nga balor sang kwarta sa nagkalain-lain nga denominasyon kag belt bag nga nagaduag itom.
Wala naman sang ginpakita nga dokumento ang suspek sa amo nga armas-luthang.
Magapangatubang sang kaso nga paglapas sa Republic Act 10591 ukon Comprehensive Firearms and Ammunition Regulation Act ang nasambit nga suspek.
Sa karon yara na ini sa kustodiya sang Roxas City PNP, para sa nagakaigo nga disposisyon.
