ROXAS CITY – Pilason ang lalaki, matapos naluthangan bangud nasal-an nga makawat sang iya tupad balay sa Barangay Dacuton, Dumarao Capiz.
Ginkilala ang biktima kay alyas Toto 42-anyos samtang ang ginapahayag suspek amu si alyas Ken 62-anyos lunsay residente sang nasambit nga lugar.
Sa impormasyon nga nakuha sang Bombo Radyo nagikan sa Dumarao Municipal Police Station, ginapahayag nga ginsugo lamang ang biktima sang iya amo nga dakpon ang ginahuptan nga manok apang naglupad ini padulong sa ila tupad balay kung sa diin yara ang puluy-an sang suspek.
Bangud sa pagdumudum nga makawat ang biktima, gilayon ini nga ginluthang sang suspek gamit ang .45 caliber revolver nga armas luthang.
Nag-angkon sang pilas sa tuhod kag kamot ang biktima nga gilayon naman ginpadangat sa Dao District Hospital para sa nagakaigo nga pagbulong.
Samtang ang suspek yara na sa kustodiya sang Dumarao MPS para sa nagakaigo nga disposisyon.
