ROXAS CITY – Nasapwan na lamang nga wala na sang kabuhi ang isa ka lalaki sa Barangay Gibato, Dumarao, Capiz.
Ginkilala ang biktima nga si Andrew Camelon, 31 anyos sang Barangay Aglanot sa nasambit nga banwa.
Base sa inisyal nga imbestigasyon ni Police Staff Sergeant Jomar Bernabe, imbestigador sang Dumarao PNP nga nakabaton ini sang tawag gikan sa isa ka anay Barangay Kagawad nga wala na ginhingadlan kag nag-impormar sa iya nga may yara sang isa ka lalaki nga wala na sang kabuhi nga nasapwan sa gutter sang karsada.
Ginapahayag nga sadtong Abril 28, alas 11 sang gab-i, nagpadulong pa ang nasambit nga biktima agud magbakal kuntani sa tiangge sang anay Barangay Kagawad sa Barangay Gibato.
Apang yara na ini sa idalom sang impluwensya sang makahulubog nga ilimnon rason nga ginpapauli na lamang ini sakay sa iya nga motorsiklo.
Matandaan sadtong Abril 29, alas 5 sang aga may nagpanawag sa anay barangay kagawad sa diin ginapahayag nga may yara sang isa ka lalaki nga wala na sang kabuhi kag ginatambakan na sang motorsiklo sa gutter sang karsada malapit sa tiyangge.
Bangud diri, gilayon nga ginpahibalo sang anay barangay kagawad sa mga kapulisan ang natabo.
Samtang, naguwa naman sa resulta sang autopsy examination nga pagkalampus ang gintunaan sang kamatayon sang nasambit nga biktima.
