Patay na sang nasapwan ang 65-anyos nga lalaki sa Sitio Agbucayo, Barangay Burias, Mambusao, Capiz.
Ang biktima amo si Ramon Soriano Lago, isa ka solterito, wala sang trabaho, kag residente sang nasambit nga barangay.
Sandig sa report sang Mambusao Municipal Police Station (MPS), isa ka concerned citizen ang nagtawag sa pulis agud ireport ang nasapwan nga bangkay sang lalaki.
Gilayon man nga nagresponde ang mga katapo sang Mambusao MPS kag natukiban nga yara na sa advanced stage sang decomposition ang bangkay sang biktima sang nakit-an ini.
Sa inisyal nga imbestigasyon, may yara sang underlying health conditions ang biktima kag naga-isahanon nga naga-istar.
Wala naman sang nakit-an nga senyales sang foul play sa lugar sang insidente.
Nagpangayo naman sang bulig ang Mambusao MPS sa Scene of the Crime Operatives (SOCO) agud nga mas maid-id pa ang imbestigasyon kag mahibaluan ang tul-id nga gintunaan sang kamatayon sang biktima.
Padayon naman ang imbestigasyon sang mga otoridad sa nasambit nga insidente.
