Lalaki nautdan sang 3 ka tudlo matapos ginlabo sang kaupod sa ilimnan

ROXAS CITY- Nautod ang tatlo ka tudlo sang isa ka lalaki matapos nga ginlabo sang kaupod sa ilimnan sa Barangay Batabat, Maayon, Capiz.

Ginkilala ang biktima nga si Efren Dumagpi, 48-anyos sang Barangay Indayagan sang nasambit nga banwa.

Nagaguwa sa imbestigasyon sang Maayon Police Station nga nagkasuay ang biktima kag ang suspek nga si Pio Lopez angut sa ila ani nga tubo.

Apang naakig si Lopez kag ginlabo sini sang makapila ka beses ang biktima sa diin nag-angkon ini sang madamo nga pilas sa lawas kag nautod pa ang tatlo sini ka tudlo.

Gilayon nga nagpalagyo ang suspek matapos ang krimen samtang padayun nga ginabulong sa ospital ang biktima.