Nagdaog sang $177,749 ukon katumbas sang P10,300,554.55 ang isa ka lalake nga ang pagpati nagahampang lamang ini sa isa ka online demo lotto.
Sa nangin panaysayon ni Alphonzo Oates, residente sang Raleigh, North Carolina, abi niya nga isa ka demonstration mode lamang ang iya ginhampang nga online lottery game sa iya nga cellphone.
Gilayon naman ini nga naka-score sang top-level ‘Epic Jackpot’ sa nasambit nga online game, matapos ang pila ka minutos nga paghampang.
Sang ulihi, nareyalisar na lamang sini nga matuod nga lottery game ang iya nga ginhampang kag nagdaog siya sang masobra $177,000 gikan sa isa ka dolyar nga iya ginbayad para makahampang sang online game.
Sang nagpadulong ini sa outlet agud i-verify, ginhambalan siya nga matuod nga lottery game ang iya nga ginhampang kag mahimo na niya nga makuha ang nadag-an nga premyo, sandig sa lokal nga kasuguan sang North Carolina.
Sang gin-interview si Oates matapos makuha ang premyo, ginpahayag sini nga gamiton niya ang masobra P10 million nga iya nadag-an bilang pambayad sa tuition sang iya nga anak nga yara na sa ulihi nga tuig sa kolehiyo.
Suno kay Oates, mas malipayon ang Christmas sini sa wala ginalauman nga kadalag-an gikan lamang sa hinali nga paghampang.
