ROXAS CITY – Dismayado ang pila ka residente sa banwa sang Mambusao matapos nga isa ka pumuluyo sang Barangay Pangpang Sur ang nakalusot kag nakapauli pa apisar nga gikan pa ini sa Iloilo kag may ginapatuman nga security checkpoints.
Ini ang ginpahayag ni Punong Barangay Nida Diaz sang Barangay Maralag sang amo nga banwa sang mainterview sang Bombo Radyo.
Suno kay Diaz nga sa ila pagpangusisa, gikan sa Tubungan, Iloilo ang nasambit nga persona kag nakapauli pinaagi sa pagsakay sini sa trak nga may karga nga goods nga padulong sa Roxas City.
Ginapahayag nga nag-volunteer ang nasambit nga persona para sa pagkarga sang goods rason nga nakalusot ini.
Apang tubtob lamang siya sa banwa sang Sigma kag pag-abot sa amo nga banwa, sa baylo nga mag-agi sa border checkpoint palusot sa Mambusao, naglaktod ini sa kauyaparan para lamang makapauli.
Suno sa opisyal nga nahangawa ang mga residente sang ila nakit-an ang nasambit nga persona kag natingala sila kun paano ini nakapauli.
Bangud diri, nagpakig-angut gilayon ang mga opisyales sang barangay sa mga health authorities agud mapabalik sa Tubungan, Iloilo ang nasambit nga persona kag mapaidalom sa self quarantine.
