Nagapadayon ang imbestigasyon sang mga kapulisan sa lawas sang lalaki nga nasunog sa Pavia, Iloilo.
Base sa inisyal nga impormasyon, nagaaso pa sang makit-an ang bangkay pasado las-kwatro sa kahilamunan sa nasambit nga lugar.
Nakibot na lang ini nga tawo gali ang nagaaso kag sunog na.
Nagpadulong na sa Iloilo halin sa Capiz ang iloy agud kumpirmahon kun iya gid bala anak ukon indi ang nasapwan nga nasunog sa Ungka I, Pavia, Iloilo.
Ini matapos nga may nakit-an nga wallet kag ID malapit sa bangkay sang biktima kag nakapangalan kay Frank Royce Apelo Barbaza nga may address nga Brgy. Punta Tabuc Roxas City, Capiz.
Sa interview sang Bombo Radyo kay Kagawad Kristelle Anne Mae Gayamat-Begalan sang Barangay Punta Tabuc, Roxas City, iya ginpahayag nga temporaryo nga nagatinir ang biktima kag iloy sini sa banwa sang Ivisan apang tumandok ini sila sang Barangay Punta Tabuc.
Suno pa sa iya, isa ka graduating college student sa Iloilo si Frank.
Apang, gina-verify pa sang mga otoridad kun ang identity nga nakabutang sa ID amo ang nasapwan nga bangkay.
Padayon pa sa subong ang imbestigasyon kag hot pursuit operation sang Pavia Municipal Police Station angut sa nasambit nga insidente.
