Nakit-an na ang lalaki nga ginaalegar nga naglumpat kag nalumos sa Barangay Cagay, Roxas City matapos ang tatlo ka adlaw nga search and retrieval operation.
Ang biktima amo si alyas Rogelio, 47-anyos kag residente man sang nasambit nga Barangay.
Sa interview sang Bombo Radyo kay Barangay Kagawad Isidro Aragon, iya ginpahayag nga nakit-an ang bangkay sang biktima nga nalubong sa balas, malapit sa floating restaurant kun sa diin ini naga-ubra.
Nahibaluan nga naglumpat ang biktima sa suba agud kuntani salbaron ang isa ka balsa ukon floating cottage nga naanod.
Suno kay Aragon, samtang nagalangoy ang lalaki, wala na ini makita bangud sang mabaskog nga current sang tubig kag hangin sa lugar.
Dugang pa sang natungadan nga base sa ila impormasyon nga ang amo nga lalaki ang wala sa impluwensya sang makahulubog nga ilimnon sang natabo ang insidente.
Sa subong, yara na sa punerarya ang nasambit nga bangkay antes nga dal-on pauli sa ila nga panimalay.
