ROXAS CITY – Ginhilway na sa karsel sang Sigma Municipal Police Station ang suspek nga ginaalegar nagpanglabo sa iya kaupod sa Barangay Parian, Sigma Capiz, matapos nagtakop na reglementary period of detention sini.
Matandaan nga ginkilala ang biktima kay Alyas Nestor, 63-anyos samtang ang ginapahayag suspek amo si Alyas Ricky, 50-anyos, nga lunsay residente sang nasambit nga lugar.
Sa impormasyon nga nakuha sang Bombo Radyo nagikan sa Sigma Municipal Police Station, ginapahayag nga pauli na kuntani ang biktima kaupod ang iya misis sini nga si Alyas Ana nagikan sa pag-inom-inom sa isa ka tiyangge sang may nagluntad nga indi pag intindihanay sa tunga sang mag-asawa.
Apang sang mabatian ini sang suspek, ginapahayag nga gin-apinan sini si alyas Ana tubtob nga ginlabo sang suspek ang biktima kabangdanan nga nag-angkon ini sang pilas sa iya kamot.
Bangud sa natabo, gilayon nga ginpadangat ang biktima sa pinakamalapit nga ospital agud dapatan sang nagakaigo nga pagbulong kag sa karun yara na sa hilway nga sitwasyon.
Samtang, boluntaryo naman nga nagsungka ang suspek sa isa ka tanod sang Barangay Malapad Cogon sa nasambit nga banwa dala ang hinganiban nga iya gingamit sa pagpanglabo.
