ROXAS CITY – Ginpanindugan sang isa ka lalaki nga ginaalegar nadakpan nga ginapatudos ang punggod sa iya nga likod sa iya kumare nga wala sang kamatuoran ang alegasyon sang iya kumpare nga may yara sila sang relasyon.
Ginpahayag ni Alyas Nonoy nga wala ini sang punggod sa likod, kabaliktaran sang nangin akusasyon sang kumpare nga si Alyas Toto.
Paathag pa sini nga wala sang malisya ukon wala sang malain nga motibo ang iya pagpadulong sa balay sang iya kumpare kag kumare nga si Nene bangud tuyo lamang sini nga mag-inum kaupod ang barkada.
Apang ginklaro ni Alyas Nonoy nga lipod sa iya ihibalo nga wala sa balay si Alyas Toto.
Ginkakibot na lamang sini sang hinali nga nag-abot ang iya kumpare kag akig ini nga nagatulok sa ila ni Alyas Nene.
Ginpakamaayo na lamang sini nga magbiya sa balay sang mag-asawa bangud posible nga ginhatagan sang iban nga kahulugan ni Toto ang iya nakita nga ila pag-inum ni Alyas Nene.
Ginapanindugan ni Nonoy nga wala sila sang relasyon ni Nene kun ini ang ginapatihan ni Toto bangud barkada lamang sila nga duha sadto pa.
Samtang agud indi na maglala ang insedente, nag-atubangay ang tatlo sa police station kag nagkasugot nga indi na magpakig-angut pa si Nonoy kay Nene kag likawan sini ang barkada.
