ROXAS CITY – Kritikal sa Bailan District Hospital ang 34-anyos nga lalaki matapos ginlabo sang iya nga bayaw sa Barangay Salgan, Maayon, Capiz.
Ginkilala ang biktima kay Gilbert Doloroc sang amo man nga lugar nga nag-angkon sang pilas sa nawala nga bahin sang guya.
Ginpahayag ni Police CorporaL Vincent Dumagpi, imbestigador sang Maayon Municipal Police Station ba-se sa imbestigasyon sang pulisya nga yara sa sulod sang balay ang biktima sang nabatian ang pagwinakal nga suspek nga si Ryan Frias, 33 anyos parte sa kahoy.
Nagguwa ang biktima kag ginkompronta ang suspek nga nagabis-ak sang kahoy.
Posible ginkaakig sang suspek ang pagmuno sa iya sang biktima, rason nga hinali niya ini ginlabo.
Gilayon nga gindala sa ospital si Doloroc agud madapatan sang nagakaigo nga pagbulong ang iya samad samtang nagpalagyo naman ang suspek sa diin padayon sa karon ang hot pursuit operation sa iya sang kapulisan.
