Ginbawian na sang kabuhi samtang ginabulong sa ospital ang isa sa duha ka mga biktima sang pagpangluthang sa Burgos Ilawod, Barangay 5, sining syudad sadtong Septiembre 5, 2021.
Ginkilala ang napatay nga si John Arce alyas Toto 25-anyos samtang padayon nga ginabulong sa Roxas Memorial Hospital si Rolando Atanque.
Matandaan nga ginpahayag ni Ronaldo Atanque, anak ni Rolando Atanque nga isa man sa mga biktima gikan sila sa isa ka selebrasyon kag nagapauli na kaupod si Arce kag Ritche Boy sang naglabay ang mga ini sa naga-inum inom nga grupo sang mga suspek kag ginsita sila.
Aminado si Ronaldo nga bangud nakainum man sila nakasabat sila sa mga suspek.
Nakibot na lamang sila sang ginhaboy sila sang botelya sang mga suspek nga sanday Bonifacio Estopia kag si Alyas Nonoy Catalan nga nagapabilin nga at-large.
Sa pihak sang natabo, ginpanugyanan ni Rolando Atanque, amay ni Ronaldo nga balikan kag makighusay sa mga suspek.
Apang sa ila pagpadulong sa lugar, naggabot sang ginapatihan .45 caliber pistol si Estopia kag nagpalupok.
Naigo sa dughan si Arce kag pilason si Atanque nga padayon nga ginabulong sa ospital.
