Dako ang posibilidad nga ginkastigo antes nga ginpatay ang lalaki nga ginsalvage sa Barangay Dolores, Dumalag Capiz.
Ini ang nagaguwa sa inisyal nga pag-imbestigar sang PNP-Crime Laboratory Region-6 sa bangkay sang biktima nga si Erlon Lego, 26-anyos sang Barangay Bagumbong, Lambunao, Iloilo.
Sa interview sang Bombo Radyo sa kay Police Lieutenant Colonel Joe Martin Fuentes, Medico Legal Officer sang PNP-Crime Laboratory Region-6 ginpahayag sini nga duha ka pilas sa ulo tuga sang pagpangluthang ang naangkon sang biktima.
Apang magluwas diri, dako ang posibilidad nga ginkastigo pa ang biktima sang mga suspetsado antes ginpatay bangud sa nakita nga mga lagub sa iya sini nga tiyan kag dughan.
Samtang duha man ka pilas sa ulo ang naangkon ni Rose Bering sang Anilao, Iloilo partikular sa idalom sang iya nga ilong kag sa likod nga bahin sang ulo sa inisyal nga pag-pangusisa sang PNP-Crime Laboratory.
Gin-athag ni Fuentes nga insyal pa gid lamang ini nga findings bangud wala pa napaidalom sa Post Mortem Examination ang bangkay sang duha ka biktima bangud ginahulat pa ang desisyon sang pamilya.
Samtang natalana naman nga ipaidalom sa Ballistics Examination ang mga basiyo nga narekober sa magkatuhay nga crime scene agud makompirmar nga isa lang ka armas-luthang ang gingamit sa pagpatay sa duha ka mga biktima.
Pinaagi sini madali maestablisar kun isa lang ka grupo ang nagpatay sa duha ka mga biktima.
