ROXAS CITY – Naghatag sang pagkabalaka sa mga residente sa Barangay Lonoy, Roxas City ang pagpapreso sang kaugalingon nga pamilya sa ila nga himata nga ginaalegar may diperensiya sa paminsaton sa police outpost.
Sa exclusive interview sang Bombo Radyo Roxas kay punong barangay Juvy Vega sang Barangay Lonoy, ginpahayag sini nga personal nga kagustuhan sang pamilya ni Mario Detoning nga temporaryo nga mabilanggo sa police outpost sang nasambit nga barangay ang ila nga himata, bangud nangin bayolente na ini sa diin sa tagsa nga magguwa sadto sa ila balay, ginasug-an sini ang balay sang ila tupad balay.
Gin-athag man ni punong barangay Vega ang pagkaposas sa kamot ni Detoning, para indi ini makahaboy sang iya nga higko sa mga nagaagi nga mga tawo sa lugar.
Suno pa sa opisyal nga wala ginapabayaan sang iya utod Detoning sa pihak nga ginbayaan ini sang asawa, bangud sila man ang nagahatag sang pagkaon diri, apang kinahanglan sini nga magpabilin sa outpost para masiguro nga indi makapanghalit sa iban nga tawo kag matalunsay nga makatrabaho ang mga utod.
Nahibaluan nga ginpakunsulta man si Detoning sa pyschiatrist kag ginhatagan na ini sng bulong, apang kasubong nga matig-a gid ang ulo sini sa diin ginahimo sa gihapon dini ang mga butang nga hugot nga ginadumilian sang doktor.
