ROXAS CITY – Dakop sa akto ang isa ka lalaki nga tuyo kun tani magkawat sang isa ka motorsiklo sa Barangay Bailan, Pontevedra, Capiz.
Ginkilala ang tag-iya sang motorsiklo nga si Arque Dacles 29-anyos kag residente sang Barangay Bailan, Pontevedra, Capiz.
Sa impormasyon nagikan sa Pontevedra Municipal Police Station, dakop ang wala makilan-an nga suspek nga ginamaneho ang motorsiklo ni Dacles nga Motorstar 125 wala sang plate no. kag may engine number nga 157FMQA034007 300metros ang kalayuon nagikan sa puluy-an sini padulong na kun tani sa national highway sang amu nga barangay sang matalupangdan ini ni Walden Bibit miyembro sang Traffic Management Unit of Pontevedra, Capiz.
Mahibaluan nga ginpapundo ni Bibit ang suspek kag ginpamangkot kun siya bala ang tag-iya sang motorsiklo kag ginpangayuan ini sang mga dokumento apang, napaslawan nga magpakita tubtob nga nagsinggit si Dacles nga ginkawat sini ang iya motorsiklo.
Sa karun yara na sa paghinakop sang Pontevedra Municipal Police Station, ang suspetsado para sa nagakaigo nga disposisyon kag natalana nga pasakaan sang nagakaigo nga panumbungon.
