Mga Ka-Bombo, gapati bala kamo nga may paglaom pa sa gihapon apisar nga dugay na nga nadula ang isa ka tawo?
Nagapati man bala kamo nga dako ang mabulig sang social media sa aton subong nga henerasyon?
Bangud isa ka lalaki nga ginkilala kay Luis Armando Albino sang Oakland, California ang nakita kag nakaupod liwat sang iya pamilya matapos ang 70 ka tuig halin sang siya ang nakidnap sang tuig 1951 sang nagapang-edaron pa lamang sang 6-anyos.
Nahimo ini pinaagi sa online ancestry test nga ginpatigayon ni Alida Alequin, 63-anyos, bilang kasadyahan lamang kuntani para mahibaluan ang geographic origins sang ila mga katigulangan,
apang amo ini ang nag hatag sang rason agud makit-an kag ma rekober ang iya nga tiyo..
Sa ginhimo nga test, may lalaki nga naggwa nga 22 percent match kay Alida kag diri natukiban nga posible ini ang nadula nga utod sang iya iloy.
Bangud sini, nagpatigayon sang imbestigasyon si Alida upod ang mga otoridad tubtob nakita si Luis sa East Coast nga isa na ka retired firefighter kag Marine Corps veteran sa Vietnam.
Suno kay Alida, ini isa ka inspirasyon nga maskin ano ka budlay, magtinguha lang kag indi madulaan sang paglaum.
