ROXAS CITY – Ginhilway na sa karsel ang 41-anyos nga lalaki nga nadakpan sa akto nga nagapatigayon sang iligal nga pataya ukon “STL Bookies” sa Barangay Poblacion Tabuc, banwa sang Maayon matapos nga nakabayad sang piyansa nagabalor sa P60,000.
Ginkilala ang arestado kay Jeffrey Bautista Esteban, residente sang Barangay Poblacion Ilaya sang nasambit nga banwa.
Matandaan nga nadakpan sa akto si Esteban nga nagabaton sang bayad sa ginapataya kag wala ini sang dokumento nga makapamatuod nga legal ang pagpataya sini.
Nakuha sa posesyon sini ang isa ka itom nga sling bag nga nagaunod sang bundle sang STL Cotejo, 1 ka bet slip nga may kombinasyon sang mga numero nga 39 kag 40, 7 ka stapler, 6 ka calculator, 1 ka gunting, 1 ka ballpen, kag P4,233 sa nagkalain-lain nga denominasyon.
